VEDTEKTER FOR STORDAL SOGELAG

• Vedtekne på skipingsmøte den 5. mai 2001.
• § 5, punkt e), siste avsnitt, endra på årsmøte 10. mars 2008, fra: ”Styret skal utpeike arbeidsutval og temagrupper til å ta seg av spesielle arbeidsoppgåver”. Dette vart samrøystes vedteke endra til: ”Styret kan utpeike arbeidsutval og temagrupper til å ta seg av spesielle arbeidsoppgåver”.

§ 1

Laget har til formål å fremje interessa for slekts- og lokalhistorie, kulturvern, samle inn og ta vare på alt som har verde for Stordal kommune og innbyggjarane si historie og som kan fortelje om folks livsvilkår gjennom tidene.

§ 2

Verksemd: For å nå formålet kan laget også i samarbeid med friviljuge lag og organisasjonar eller aktuelle kommunale organ:

• arrangere møte, kurs, ekskursjonar, foreta registreringar, samle inn muntleg tradisjon, musikk, målføre, stadnamn, fotografi og anna av historisk interesse.
• arbeide for at det kan bli utgjeve bygdebøker og elles utgi årbok, medlemsblad eller andre historiske skrifter, halde utstillingar og visninger.
• arbeide for vern av fornminne og kulturminne av alle slag i kommunen.
• delta i samfunnsdebatten når det gjeld kulturvern, f..eks. som høyringsinstans i relevante kommunale saker.
• gjere laget si verksemd kjend og vist for innbyggjarane i kommunen.

§ 3

Laget kan slutte seg til Landslaget for lokalhistorie, Sunnmøre historielag og andre lag og instansar som har samanheng med lagets formål og verksemd.

§ 4

Medlemer av laget er:
a) Einskildpersonar
b) Lag, organisasjonar, bedrifter, institusjonar, kommunen og kommunale organ.
c) Æresmedlemer: medlemer utnemnd av årsmøtet etter innstilling frå styret.
Kontingenten blir fastsett av årsmøtet.
Utmelding av laget må skje skriftleg.

§ 5

Laget skal leiast av eit styre på fem medlemer med tre varamedlemer
Årsmøtet vel:
a) Leiar for eitt år.
b) To styremedlemer for to år (av fire styremedlemer står to på val annakvart år).
c) Tre varamedlemer for to år.
d) To revisorar for to år.
e) Valnemnd på tre medlemer for eitt år. Styret gjer forslag til valnemnd.
Styret vel nestleiar og engasjerer sekretær/ kasserar og rekneskapsførar.
Styret blir samankalla av leiaren. Styremedlemene skal få innkalling minst tre dagar før møtet.
Styret er vedtaksført når minst tre medlemer er tilstades. Styret kan utpeike arbeidsutval og temagrupper til å ta seg av spesielle arbeidsoppgåver.
Varamedlemene skal ha tilsendt sakspapir.

§ 6

Rekneskapet skal førast for kvart kalenderår og leggjast fram for årsmøtet til godkjenning i revidert stand. Styret engasjerer rekneskapsførar.

§ 7

Dersom laget tar opp lån for å få gjennomført ei eller fleire saker, vil juridisk ansvarleg person vere leiaren eller den styret peiker ut.

§ 8

Årsmøtet bør haldast kvart år innan utgangen av mars eller til eit anna tidspunkt som årsmøtet bestemmer. Det skal kunngjerast i lokalavisene med 14 dagars varsel.
Årsmøtet skal handsame:
a) Årsmelding
b) Revidert rekneskap
c) Val
d) Fastsetting av kontingent
e) Innkomne forslag (f.eks. til endring av vedtektene). Alle som møter personleg og som har betalt kontingent for siste året, kan stemme. Saker som ein ynskjer at årsmøtet skal handsame, må vere komne inn til styret seinast 8 dagar i førevegen.

§ 9

Ekstraordinært årsmøte kan innkallast når styret bestemmer det eller når 10 røysteføre krev det.
For innkalling og varsel gjeld same reglar som for årsmøtet.
Ekstraordinære årsmøte kan berre handsame den eller dei saker som er annonsert i innkallinga.

§ 10

Årsmøtet utnemner æresmedlemer etter forslag frå styret.

§ 11

Vedtektsendringar kan foretakast på årsmøtet med 2/3 fleirtal.
Forslag til vedtektsendringar må vere styret ihende innan utgangen av desember.

§ 12

Oppløysing av laget kan skje når 2 påfylgjande årsmøte vedtek det med 2/3 fleirtal.
Lagets arkiv, aktiva og medel går då over til Stordal Kommune.

Skriv ut denne sida