Turlaget sin første topptur i år. Vi var heldig med veret, og 19 personar var med på turen. Møre og Romsdal Fylke har ein eigen turportal www.morotur.no og turen var ein av 20 turar som ”kick-off” for satsinga. Turen var annonsert i media i fylket, og dermed var vi så heldige å ha med også folk utanom kommunen.

Starten var frå Mo, opp til Mosætra på 450 moh. Lett å finne fram hit, litt bratt opp, men heilt fint å gå. Vidare gjekk vi råsa mot Moheia, som går bak det øverste selet. Moheia er ei flate med litt myr, vi passerer den og set kursen mot sjølve Mohornet på 883 moh. Hit opp brukte ca 2 timar. Vi rastar kort her, før vi set kursen mot målet for dagen: Storheimshornet. Det er litt ur og snøbrear på veg til toppen. Toppunktet/varden ligg på 1048 moh, og opp hit brukte vi i alt litt over 3 timar. Her tok vi pause med utdeling av premiar frå Morotur – headneckers i fine fargar.

Utsikta frå varden på Storheimshornet er mot dalane og andre fjell. Vi gjekk vidare ned mot kanten, der vi fekk ei skikkeleg god utsikt over Stordalen og fjorden. Herifrå gjekk vi bratt ned til Rikjendbotnen og over elva Rikjenda. Herifrå er det ganske flatt innover, før det går ned frå Reset til Mebusætra. Nokre sprekingar tok også med seg ein tredje topp på vegen; Turrnausa på 678 moh.

Siste samling var på Mebusætra, der vi åt siste sjokoladebitane og dei tørka aprikosane. Vi kom ned på Midtbust etter 6,5 timers gange.

Fakta:
Dato: søndag 26. juni
Tidsbruk: ca. 6,5 timar
Antal deltakarar: 19

Sjå fleire bilder i bildegalleriet

Skriv ut denne sida